ياريتنى نحول وانتى زينه

يا ريتني نحول وانت زينه...

علي كل وردة شابكين أيدينا

ياام الميامي حور.... يا ريتني طاير معاك أندور

ومعانا رفيقي وصاحبي فرفور... أيقول هُبلا في الجو ويلاقينا

ونلقوا ورود مفتحه وزهور... ونطيرو ولا دبور يوصل فينا

ونشموا روايح فايحه وعطور.... وزاد نطربو البستان بأغانينا

ومعاك طول عمري أنكمله مسرور... المولي كريم يحقق أمانينا

************


يا ريتني نحول وانت زينه ... كل يوم نا وإياك في جردينه


***********
في وسط قلبي انحطة ... رفيق عمرنا السموح بو فرفطه

مزخرف جناحه بفن يعجب خطا ... معاه نقعدوا أناجوه ويناجينا

وفرفور اينقز فوق محلا نطا...و جايب هدية فرحنا يهدينا

و قدامنا تسبح صغار البطة .. وإحنا فراحا وماسكين أيدينا

ووين شافنا الهبوط زاد توطا ... نزل من العلالي جاي بيحينا


***********

يا ريتني نحول وانت زينه ... كل يوم نا وإياك في جردينه



***********

يا ريتني نحول ...كل يوم عالزهره معاك أنجول

انعيشو طرابه عمرنا بالطول ... وفصل الربيع بطيبتا إيزهينا

ونحطوا رفاقه في أزهار الفول ... ومنها نطيروا فوق من يسمينا

لا نفسدوا ولا ناكلوا محصول ... نمصوا الرحيق ومصته تكفينا

ونعيشوا تملي لا خبر لا قول ... ولا بشر حاسدنا أيراقب فينا


***********


يا ريتني نحول وانت زينه... كل يوم نا وإياك في جردينه


***********

ياريت لي جنحاني... أنطير وين ما عين البشرمااتراني

مع اللي ديما مالكه وجداني... في الجو نسبح شابكين أيدينا

ونعيشوا طرابه لا هموم أنعاني... كيف ما انتمنوا ربنا يعطينا




يا ريتني نحول وانت زينه...كل يوم نا وإياك في جردينه




هذة منقولة وجدتها في العديد من المنتديات ولم يذكر فيها أسم الشاعر

((هذا للأمانه العلمية ))